Min pawm loh chuan khawvel tan buaina a la ni thei ang : Taliban
Afghanistana rorellai, Taliban chuan US leh ram dangte chuan an kaihhruai sorkar chu pawm tura nawrin, an pawm duh lo leh Afghan mipuite tana sum lut tur an dang chat chhunzawm zel a nih chuan ramchhung mai ni loin khawvel huap buaina pawh a tling pha thuai dawn tih an sawi.
Taliban te'n August thlaa rorelna an hnehchhuh hnu hian khawi ram mahin Taliban sorkar hi an la pawm lo a, hei bakah hian Afghanistan sorkar thil neih leh ram dang aṭanga sum lutte chu an dansak mek bawk.
"America hnena kan hriattir duh chu, kan sorkar hi min pawm lo zel a nih chuan Afghan mite buaina a awm chhunzawm zel dawn a, hei hi region buaina ni chhoin khawvel pum tana buainaah a chang chho thei dawn a ni," tiin Taliban thupuangtu Zabihullah Mujahid chuan Inrinni-a press conference a neihah a sawi.
Taliban leh United States te indo chhan ber chu inzawmna mumal tak an siam loh vang nia sawiin, an inkara indona a chhuahna chhante chu inbiakna hmanga chinfel theih a nih hlawm thu a sawi bawk.
Afghanistan-a Taliban sorkar hi eng ram mahin la pawmpui lo mah se ram eng emaw zat official-te chuan Kabul leh ram pawn lamah Taliban hruaitute hi an lo hmu tawh bawk a ni. Inrinni liam ta pawh khan Turkmenistan foreign minister Rasit Meredow chuan Kabul a tlawh a, Taliban sorkar aiawhte a hmu. Kar liam ta tir lam khan China foreign minister Wang Yi leh Taliban official-te chu Qatar-ah an inhmu bawk a ni.
Mipui hmuhah Taliban supreme leader inlan
Taliban-ten Afghanistan-a thuneihna an chan hnua a ṭum khatna turin Taliban hruaitu lu ber, Haibatullah Akhundzada chu an ram chhim lam, Kandahar khuaah Inrinni liam ta khan mipui hmuhah a inlan.
Sorkar an siam hnuah pawh Akhundzada hi a inlan ngai loh avangin a chanchin pawhin ngaihven a hlawh hman hle.
A hma pawhin Akhundzada hi mipui hmuah a inpholang ngai vak lo a, mahse Inrinni khan Kandahar-a sakhaw school, Jamia Darul Aloom Hakimia tlawhin a inpho lang ve ta a ni. Afghanistan-a Taliban-ten sorkar an din hnuah pawh, Akhundzada hi kum 2016-a an pawl hotu lu ber, supreme leader a nihna chu a la chelh chhunzawm zel a ni.