China-a khualzin tangkhangte chhuak thei ta

China sorkarin an rama Covid-19 hri kai an pun thar leh avanga sawilawk loa lockdown a puan avanga khualzin tangkhang tam takte chuan an awmna hmun an chhuahsan thei ṭan ta.

State news agency chuan Ejin Banner region-a khualzin 10,000 chuang tangkhangte hruai chhuahna turin thuneitute chuan ruahmanna siamin, Zirtawpni aṭang khan relin Inner Mongolia aṭangin Zhengzhou khaw lam an pan thei tawh tih a sawi.

Ejin Banner bialah hian tun hnaiah hri kai thar 100 chuang hmuh chhuah niin, heng zinga a tam zawk chu Inner Mongolia-a mi an ni. Hri darh lehna chhan hi hriatchian la ni lo mah se, Inner Mongolia-a lawngchawlhna hmun aṭanga rawn luh thar leh nia ngaih a ni. Hei vang hian October 18 aṭang khan sorkar chuan puan lawk loin hri darh tur venna khuahkhirhna a siam thar leh a ni.

Tun hnaia China ramah hri kai an pun leh avangin hmun eng emaw zatah khuahkhirhna hi siam thar leh a ni. October 16 aṭang hian provincial-level region 31-ah hri kai thar hi 14 an awm tawh a ni. China chuan an rama mipui 75% chuan vaccine dose bikimin an la tawh tih a sawi a, provincial level region 20-ah booster dose pek chhuah leh tum niin, region 12-ah tun kar aṭang hian naupang kum 3-11 inkarte hnenah vaccine hi pek tum a ni bawk.