UN General Assemby president atan Ecuador minister thlang

United Nations General Assemby chuan Thawhlehni khan president thar atan Ecuador Foreign Minister Maria Feranda Espinosa Garces-i an thlang a, member ram 193 awmnaa kum 73 chhunga hmeichhe zinga president ni thei pali-na tur a ni.

Secret ballot hmanga vote thlaknaah Maria Fernanda Espinosa Garces hian hmeichhe candidate vek, Hondurs UN ambassador Mary Elizabeth Fores Flake-i chu 128-62 in a hneh. Vote thlaknaah hian member pahnih an hai thung.

UN Assembly president hna hi regional group-ten an inchelh chhawk ṭhin a, September thla aṭanga session thar inṭan turah hian presidnet hi Latin America leh Carribean group te chelh hun a ni. Regional group-te hian president atan hian nominee pakhat an thehchhuak a, hei hi assembly a lo pawmpui mai ṭhin a ni. Mahse kuminah Latin America ramte hian nominee ruat turah inremna an siam theih loh vangin candidate-te in contest-in president dinhmun hi an inchuh a ni.

Espinosa Garces-i chuan Latin America and the Caribbean aṭangin hmeichhiate zinga UN assembly hotu hna chelh thei hmasa ber a nih dawn tih sawiin, rilru zau tak puin, midangte rawtna leh ngaihdante ngaihthlak sak a, thawhpui zel a tiam.