Hafiz Saeed-a pawl JuD in inthlanah chuh dawn

Pakistan firfiakten Mumbai khawpui an beihnaa mawhphurtu bera puh, Hafiz Saeed-a pawl, Jammat-ud-Dawah chuan kumin July 25-a Pakistan inthlanpui neih turah Allaha-u-Akbar Tehreek tih hmingin chuh an tum.

JuD in political party a din, Milli Muslim League (MML) chu Election Commission of Pakistan (ECP) in a la register loh avangin ECP-a in register tawh, Allaha-u-Akbar Tehreek (AAT) hming hian inthlan hi an chuh dawn a ni. AAT hian symbol atan 'chair' a hmang dawn a ni.

MML hian inthlanpui neih tura an candidate turte chuan 'chair' symbol hmang hian an chuh dawn tih a sawi a, hemi rual hian ECP-a MML registration tih a nih theih nan an bei zel dawn tih a sawi bawk. MML president Saifullah Khalil chuan ECP-ah hian political party 350 chuang resgiter an ni a, hetihlai lai hian MML register tum hi dodalna a awm a ni, a ti. ECP-in MML registration a tihkhawtlai sak vang hian Islamabad High Court (IHC)-ah pawh petition an thehlut tawh tih a sawi bawk.