Ram 100 chuang hruaituten kum 2030-ah ram ngaw ṭhiah tihtawp intiam

Glasgow-a COP26 climate talk neihah khawvel ram hrang hrang 100 chuang hruaitute chuan kum 2030-ah ram tihchereu leh ram ngaw ṭhiatte tihtawp an intiam. Ramngaw venhim leh din tharna turin public leh private fund-ah USD tluklehdingawn 19 dah an rel bawk.

Ram hrang hrang hruaitute aiawha UK Prime Minister Office-in thuchhuah a siamah, Glasgow Leaders' Declaration on Forest and Land Use hian ram ngaw, square mile maktaduai 13 chuang a huam dawn a ni. Britain prime minister Boris Johnson chuan, "Mihringte hun rei tak aṭang leilung tichhetu an lo nihna chu tihtawpin, a vengtu zawk kan ni tawh dawn a ni," a ti.

Global Forest Watch-in a tarlan danin, kum 2020 khan khawvela forest area square km 2,58,000 chu tihchhiat a ni a, hei hi UK ram pum ai pawhin a zau zawk a ni.

Glasgow-a inremna an siamah hian ram 12-te chuan 2021-2025 inkar chhungin ram ngaw din thar leh ram kang venna atan ram ṭhang mek, developing country-te puihna atan public fund USD tld 8.75 pek an tiam. Hei bakah hian private sector 30 chuang hnenah sum tam tham tak pek an ni bawk ang.