Khawvelah Covid-19 vanga thi mtd 5 chuang tling tawh

Kum hnih dawn liamtaa China rama Covid-19 hmuhchhuah anih aṭangin he hri vang hian Thawhṭanni khan khawvel pumah mi maktaduai nga chuang an thi tawh.

Covid-19 hri vanga thi zat chhinchhiah hi thla li liam ta khan maktadual li a ni a, Thawhṭanni khan maktaduai nga an tling chho leh tawh a ni. Hetih lai hian ram hrang hrangah Covid vaccine pekchhuah zel a nih avangin he hri thihpui zat hi an tlahniam a ni. October thla tir lam khan khawvel huapin nikhata hri vanga thi hi 8,000 hnuailamah a vawikhatnan an tlahniam.

Mahse tun hnaiah hri kai thar hi an pung chho leh ṭan a, "Europe-a hri inkaichhawnna nasa tak thleng leh avangin thla hnih hnua a vawi khatnan Covid-19 kai leh thihpui an pung a ni," tiin World Health Organization hotu Tedros Adhanom Ghebreyesus chuan karliamta Ningani khan a sawi.

WHO European region-a ram leh territory 52 aṭanga thihpui tam zualnate chu khawchhak lam aṭanga mite an ni. Vaccine la duh lo tamna Russia chuan hri kai leh thihpui record thar an siam a, October 20 hnuah nitin hri vanga thihpui chu mi 1,000 chuang an awm ziah a ni.

Russia dawtah Ukraine leh Romania chu Europe ram zinga thihpui tamna niin, ni sarih liamta chhunga nitina thi zat hi 546 leh 442 ve ve an ni.

Latin America leh Caribbean hi hripui len hnua khawvel region zinga thihpui tamna ber (1,521,193) an ni. Mahse nitina thi zat hi mi 840 ni mekin May thla aṭang khan tlakhniam lam a la pan mek zel.

United States-ah chuan ni sarih liamta chhungin nitina thi zat chu chawhrualin mi 1,400 ni mekin, a kar liamta ai khan 15% in a tlahniam a ni. US-ah hian hri vanga thi 7,46,747 awm tawhin, hripui leng tuar na ber ram an ni.

WHO chuan Covid-19 nena inzawmna nei thihpui tam tak an awm avangin hri pui vanga thi zat hi official record-a chhinchhiah aiin a let hnih aṭanga a let thum thlenga a san zawk theih thu an sawi.

Mahse tun hma lama hripui lengte aiin thihpui zat hi an tlem zawk thung a, kum 1918-1919-a Spanish flu leng kha khawvel pumah mi maktaduai 50-100 inkarin an thihpui a ni. Mahse Covid hian hun reilote chhungin mi tam tak thihna a thlen thung a ni tiin, French virologist Jean-Claude Manuguerra chuan a sawi a, ""Inkhuakhirhna dan mumal tak siam, a bikin mipuite chetvelna khuahkhirhna siam leh vaccine semchhuah te hi ni lo se chuan hei ai hian a la rapthlak thei ang," a ti.