Iraq Parliament-in vote chhiar ṭhat a remti

Iraq Parliament chuan thla hmasaa inthlanpui neiha vote tlate chu khawl hmang loa chhiar ṭhat a remti a, thupek a tichhuak nghal bawk.

May thlaa inthlanpui neihah hian vote tihchingpen nia sawi a ni a, hei bakah hian electoral official-te chu electronic vote-counting machine ṭha lo te enfiah tawk loah puh an ni bawk. Election commission hotu chu thlak nghal a nih bakah, rampawn lama vote thlakte pawh hnawl a ni bawk a ni. Ramchhunga vote tla, vote maktaduai 11 vel chu chhiar ṭhat leh vek a ni dawn a, hei hian official result tihchhuah tawh hi a thlak danglam thei dawn em tih hriatchian a ni lo.

Prime Minister Haider al-Abadi chuan security agency-te chuan dan bawhchhiatna a thleng ngei tih finfiahna an nei niin a sawi. An buaina bul ber chu a ṭum khatna atana electronic vote-counting machine an hman chu a nih thu a sawi bawk. Independent High Election Commission (IHEC) member-te chu an hna thawk ṭha lo leh, vote thlakna khawl dik lo awm te enfiah tawk loah a puh. IHEC official-te chu a phalna la loa ram pawn lama zinchhuah a khap a, thubuai pawh siamsak an ni maithei tih a sawi.

Official result-ah chuan Parliament-a seat 328-ah Shia Muslim cleric Moqtada Sadr-a kaihhruai ṭangrual pawl chuan seat 54 lain seat ngah ber an ni.