Trump-an US-a zin turin Kim a sawm mai thei

US President Donald Trump chuan June 12-a North Korea ram hotu, Kim Jong-un nena meeting an neih tur chu a hlawhtling viau a nih chuan NKorea hotu hi US-a zin turin a sawm maithei tih a sawi. Hemi rual hian inbiakna hi beisei anga a kal ṭha lo a nih chuan tawpsan mai a pawiti dawn lo tih a sawi nghal bawk.

White House-a Japan Prime Minister Shinzo Abe nena news conference an neihah, Trump chuan meeting an neih turah hian Kim nen hian 1950-53 Korean War tihtawpna tur inremna an siam mai thei niin a sawi. US leh NKorea sorkar inlaichinna chu eng tikah emaw chuan a la ṭhat chhoh a beisei thu a sawi. Trump chuan inbiakna hi a beisei anga a kal ṭha lo a nih chuan tawpsan mai a pawiti dawn lo tih a sawi a, NKorea pawh nuclear progarmme titawp tura na taka an nawr chhunzawm nghal tur thu a sawi.

US Secretary of State Mike Pompeo chuan President Trump hian beiseina sang tak nen meeting hi a nei dawn tih a sawi. US-in a phut anga NKorea-in nuclear programme a titawp a nih chuan NKorea ram himna tur chu ngaihtuahsak a tiam bawk.