Malaysia Prime Minister-in minister-te thilpek dawn khap

Malaysia Prime Minister thar Mahathir Mohamad chuan a minister-te chu thilpek dawn a khap.

May 10-a Prime Minister atana lakluh, Mahathir Mohamad chuan eirukna laka fihlim sorkar siam a tiam a, hemi atana hmalakna kawng pakhatah minister-te chu thilpek dawn a khap a ni. Minister-te hnena thilpek pe duh an awm pawhin, pangpar, thei leh ei tur bak pek theih a ni lo tih nimina press conference a neihah a sawi.

Malaysia-ah hian sorkar hnathawkte chu thilpek an dawn khap an ni tawh a, PM thar hian minister-te pawh a huam tir ve leh ta a ni. Hemi hma hian minsiter-te chu an thil neih zat puangzar turin a lo hriattir tawh bawk. Hei hi anti-corruption hotute chuan uluk takin an enfiah ṭhin dawn a ni.