Myanmar sipaiten ram dangte nawrna hnawl ; ASEAN palai leh Suu Kyi inhmuh remti lo

Myanmar sipai sorkar chuan ram dangten an nawrna chu hnawlin, Association of Southeast Asian Nations (ASEAN) palai leh pawn chhuak thei loa hren mek, Aung San Suu Kyi-te inhmuh a remti lo.

Sipai sorkara hotu lu ber dawttu, vice senior general Soe Win chuan thubuai nei mek leh ram dang palai inhmuhtir hi an ram dan kalh a ni tih a sawi. "Eng ram mahin an ram danin a phal chin bakin thil tih an phal bik ka ring lo," tiin a sawi.

Myanmar sipaiten civil sorkar thuneihna an hnehchhuh hnua an rama tualchhung buaina chhuak tihtawp a nih theih nan leh, boruak muanawm a awm theihna tura ASEAN hruaitute leh Myanmar sipai hotuin inremna an lo siam tawh chu sipaite hian a taka an kenkawh loh avangin ASEAN summit neih takah khan Myanmar sipai hotu pawh hi sawm a ni ve ta lo a ni.

Hetih lai hian Soe Win chuan April thlaa ASEAN nena inremna an lo siam tawh zawm ṭha lo nia puhna chu a pha a, ASEAN chu Myanmar ram chhung inrelbawlnaa inrawlh chhunzawm zelah a puh.

February 1-a civil sorkar thuneihna hnehchhuh a nih aṭang khan ram chhunga sipai sorkar duh lohna lantirin buaina a la chhuak chhunzawm reng. Nawrh hauihawt leh security force-te innawrbuainaah civil mi 1,200 chuang an thi tawh a, mi 9,500 chuang man an ni bawk.