Ethiopia-in rampumah emergency a puang

Ethiopia sorkar chuan Thawhlehni khan ram pumah emergency a puang a, an ram khawpui Addis Ababa-ah Tigrayan hel pawl luh an tum nia thawm a awm avangin khawpuia chengte chu an chhungkua leh vengte venghim tura inbuatsaih turin a chah.

Tigray People's Liberation Front (TPLF) helpawlte hi kum khat chuang chu prime minister Abiy Ahmed-a kaihhruai sorkar nen an inep tawh a, tunhnaiah helpawlte hi hma an sawn chhoh zel avangin sorkar chuan he thupek hi a tichhuak a ni.

"State of emergency hi TPLF helpawl te'n ram chhung hmun hrang hranga buaina an thlen theihna tur laka vantlang mipuite venhimna tura tih a ni," tiin state-affiliated Fana Broadcasting Corporate chuan a tarlang. Hei hian eng chen nge a huam dawn erawh sawilan a ni lo.

Thawhlehni khan Addis Ababa-a official-te chuan mipui maktaduai nga chennaah hian inkaihhruaina thar an tichhuak a, ni hnih chhunga an ralthuam neihte register turin thupek an siam. Mipuite himna tur leh boruak ralmuang a awm theihna turin sipaite nen thawkhoin ruahmanna an siam tur a ni, tiin peace and security administration bureau chief Kenea Yadeta chuan a sawi.

Kenea chuan ṭhalaite chu dan kengkawhtute nena thawkho tura lakluh an nih dawn thu sawiin, inralrinna atan vantlang mipui zawng zawngte , ram neitu leh hotel neitute pawh uluk takin mi inluah hawhtu leh mikhualte nihna enfiah ṭhin turin a chah bawk.

PM Abiy hian nikuma TPLF helten army camp an beih hnu khan helpawlte man leh an ralthuamte laksak turin Tigray-ah sipai a lo tir tawh a ni.

Kum 2019-a Nobel Peace Prize lo dawng tawhtu, Abiy hian TPLF hel lakah hnehna chan thuai tiam mah se, kumin June thla aṭang khan helpawlte hi intuaithar lehin Tigray-a hmun tam zawk chu an la let leh tawh a ni.An ram ṭhenawm Afar leh Amhara region-ah pawh beihpui an thlak leh chhunzawm bawk.

Tun hnai chho khan TPLF hian Addis Ababa aṭanga km 400 a hlaa awm Amhara-a khawpui pawimawh pahnih lain an thununna hnuaiah an awm mek a ni. An ram khawpui, Addis Ababa-ah erawh buaina la awm lo mah se, helpawlte hian khawpui lak an tumna chu an la ṭhulh loh thu an sawi.

Hetih lai hian Ethiopia sorkar chuan TLPF-in ram an lak chin nia an sawi chu a dik lo niin a sawi thung.

Ethiopia hmar lama hmun tam zawk chu inbiakpawhna tihtawp a ni a, journalists-te pawh luh an khapsak a , a hmuna thil thleng chu chiang taka hriat theih a ni lo a ni.

Helpawl dang pakhat, Oromo Liberation Army (OLA) pawhin Addis Ababa hual vela Amhara leh Oromia region-ah hma an lak mek thu an sawi.