US-in kum 5 chin hman atan Pfizer vaccine pawm
US chuan Pfizer/BioNTech Covid vaccine chu kum 5-11 inkarte hman turin a pawm fel ta.
Centers of Disease Control and Prevention (CDC) director Rochelle Wolensky chuan uluk taka an zirchian hnuah naupangte hnena pek turin a pawm ta a ni. Hemi hma hian kum 12 chin chu he vaccine pek hi an lo phalsak tawh a ni.
Expert-te chuan nunphung a pangngai chhoh leh theihna turin naupangte hnenah vaccine pek hi thil ṭul tak a nih thu an sawi.
Food and Drug Administration (FDA) official-te chuan vaccine hian naupangte hi Covid hri lakah 91% velin a veng thei dawn niin an sawi a, Pfizer-in naupang 2,268-a zirchianna an lo neih tawhah side-effect nasa tak pawh a awm lo tih an sawi a ni.
Vaccine hi kum 5-11 inkarte chu puitling hnena pek dose hmun thuma ṭhena hmun khat pek an ni dawn a, hriau pawh te zawk hmangin dose khatna lak aṭan kar thum hnuah dose hnihna pek an ni ang.
President Joe Biden chuan naupangte vaccine pek a ni theih dawn tak avangin nu leh paten hlauhthawnna nasa tak an lo neih pawh a tawp thei dawn ta a ni, a ti.
US hi Covid-19 hri kai leh thihpui tamna ber ram niin, hri kai hmuhchhuah tawh zingah hian naupang kum 5-11 inkar hi maktaduai 1.8 an awm tawh a, an zinga mi 200 velin an thihpui tawh bawk. Mahse thihpui zinga a tam zawk hi natna dang nei sa an ni.
America mi maktaduai 106 chuang te chuan Pfizer vaccine hi dose kimin an la tawh a, an zingah hian kum 12-15 inkar maktaduai sarih vel an tel.