China-ah thla thum hnua hri kai tam ber ni ber thleng

China rama tualchhunga Covid-19 hri kai an pung chho zel a, Thawhlehni kha hri kai thar hi thla thum dawn hnua an tam ber ni a ni. Hri kai an pun thar leh avangin ram chhung hmun eng emaw zatah khuahkhirhna pawh siam leh a ni a, an ram khawpui Bejiing-ah pawh hri darh tur venna atan khuahkhirhna khauh zawk an kalpui leh rin a ni.

National Health Commission chuan November 2 khan tualchhungah hri kai natna langchhuak, symptomatic case 93 an hmuchhuak tih a sawi a, a hma ni chiahah mi 54 hmuhchhuah an lo ni tawh bawk. Thawhlehni kha China rama hri kai darh hnuhnun ber Aug. 9 hnua ni khata hri kai an hmuhchhuah tam ni ber ani.

Beijing-ah Covid-19 kai thar mi pakua an awm a, January 19 hnua an tam ber ṭum a ni.

October thla chawhnu lam aṭang khan China khawpuiah hian nitin hri kai thar pung zel mah se China ram pawn lam ngaihtuah chuan hri leng dinhmun hi a la ziaawm hle. Mahse sorkarin hri kai awm lohna, zero-tolerance policy a kalpui mek avangin hri darh zel tur venna atan hian khuahkhirhna khauh tak a kalpui nghal a ni.

Shopping mall, supermarket, hotel, cinema leh subway station luh dawnah-te temperature screening neih ṭhin a ni ; an hriselna dinhmun, health code hriatnan an mobile phone-te enfiah sak an ni ṭhin bawk.

Beijing thuneitute chuan khawpuia chengte chu hmun danga zin chhuak lo turin an ngen fo a, inneihna hunte pawh sawnhla a, mitthi vuinate pawh zangkhai zawk a kalpui tur leh ṭul loa punkhawmnate huaihawt lo turin an chah fo a ni.

Nimina Beijing Daxing Airport-a flight scheduled 60.4% chu cancel an ni a, Beijing Capital Airport-a flight 49.8% te chu tihtawp vek a ni.

Beijing-a hri kai pung zel karah member 300 chuang telna tur, Communist Party Central Committee chuan inkharkhipna hnuaiah Nov. 8-11 inkar hian inhmuhkhawmna hun an hmang dawn a ni. Hei hi committee vawi rukna leh kum 2022-a Party Congress an neih hmaa plenum meeting hnuhnung ber tur a ni bawk.

Plenum-ah hian President Xi Jinping chuan a thuneihna sawhnghehna tur leh nakkum aṭanga inṭan tura a term thumna hmanna tur resolution a siam rin a ni.

Beijing khawpui pawn lamah pawh tualchhung aṭanga hri kai thar an awm bel zel a, Heilongjiang, Hebei, Gansu, Inner Mongolia, Ningxia leh Qinghai-ahte hri kai thar hi hmuhchhuah an ni. China chhimthlang lamah pawh hri kai thar hmuhchhuah niin, Chongqing municipality leh Sichuan leh Yunnan province-ahte hmuhchhuah thar an awm bawk. Jiangxi chhim lamah pawh hri kai thar mi pahnih an awm bawk a ni.

Rampawn aṭanga hri kai thar hmuhchhuahte nen China-ah hian Nov 2 khan hri kai 109 an awm thar a, a hma ni chiah khan mi 71 an awm thung.

Nov. 2 thleng khan China rama Covid-19 hri kai hmuhchhuah tawh chu mi 97,423 an ni.