Taliban-te'n Afghanistan-ah ramdang pawisa hman khap; Dan bawhchhia te chungah hremna lekkawh dawn

Afghanistan-a thuneihna changtu, Taliban sorkar chuan an ram chhunga ram dang pawisa hman khap tlat a nih thu a sawi. He thil hian Taliban kuta a awm hnuah Afghanistan ram economy tlachhe mek dinhmun chu a tihchhiat lehzual rin a ni.

Taliban sorkar chuan dan bawhchhiate chungah hremna na tak lekkawh anih tur thu an puang nghal bawk.

"Islamic Emirate (Taliban) chuan khua leh tuite, dawr nghaktu, sumdawng leh mipui nawlpuite chu Afghanis pawisa chauh hmang turin a ti a, ram dang pawisate chu hman khap tlat a ni, " tiin Taliban thupuangtu Zabiullah Mujahid chuan a sawi.

"Thupek bawhchhiate chu dan hnuaiah hremna an hmachhawn dawn a ni" tiin a sawi zui bawk. Afghanistan-a sumdawnna hmunahte hian US dollar hi pawisa hman tlanglawn ber a ni. Hei bakah ramri chhehvela chengte chuan an ṭhenawm ram, Pakistan pawisate pawh sumdawnna atan an hmang ṭhin bawk.

Hetih lai hian August 15-a Taliban-ten thuneihna an chan hnuah, Afghanistan pawisa tur USD tld 9.5 chu US World Bank leh International Monetary Fund (IMF) te chuan khawih chet theih lohin an hren sak mek a ni. Taliban chuan sum an hreksak hi pe chhuak turin a nawr reng a ni.

Taliban sorkar a din hnuah Afhgan mi tam tak chu himna zawngin ram chhung hmun dangahte an tlanchhia a, hetih lai hian mi sang tel chu ram pawn lamah an tlan chhuak bawk. Ram dangten Taliban sorkar hi an la pawmsak hlawm lo a, ram pawn aṭanga chhawmdawlna an dawn ṭhinte pawh tihtawp a nih hrih avangin mipuite chu dinhmun harsa tak hnuaiah an awm mek a ni.

International Monetry Fund (IMF) chuan Afghanistan ram economy hi kuminah 30% velah a tlahniam thei dawn nia sawiin, mi maktaduai tel chu retheihna khurah an tlukluh phah thei dawn tih a sawi. Hei bakah an ram sum dinhmun tlakchhiat vangin raltlan an pung zel ang a, hei hian an ram ṭhenkhatte thlengin a nghawng dawn niin a sawi.