Myanmar court-in US journalist bail dilna hnawl ; Thubuai thar a siam belh sak
Myanmar court chuan thla nga chhung lungina tang tawh, American journalist Danny Fenster bail dilna chu an hnawlsak a, thubuai thar siam belh sak a ni leh zawk niin a lawyer chuan a sawi.
Danny Fenster hi thu thar dik lo leh buaina chawk chhuak thei zawng thu thehdarhah puhin thubuai hi siamsak a ni tawh a, a thubuai hian thiam loh chantir a nih chuan kum thum thleng lungina tan tir theih a ni. Hei bakah hian Myanmar sipai sorkar dan pawna a hnawl pawlte nena inkungkaihna neia puhin, Unlawful Associations Act a bawhchhiat avangin thubuai siamsak a ni bawk a, he dan hnuaiah hian kum hnih aṭanga kum thum thleng lungin tang tura hrem theih a ni.
Fenster-a lawyer, Than Zaw Aung chuan Fenster hi Nilaini khan immigration law bawhchhiaa puhin thubuai siam belh sak leh a ni tih a sawi a, hei hi thla ruk aṭanga kum nga thleng lungin tang tura hrem theihna a ni.
United Nations-a US ambassador hlui Bill Richardson-a'n Myanmar a tlawh laiin court chuan he thutlukna hi a lo siam a ni. Bill hi sipai sorkar hnuaia Myanmar-a mihring dinhmun harsa taka ding mek te ṭanpui dan turte sawipui tura kal a ni.
Fenster hi online news magazine Frontier Myanmar-a managing editor a ni a, May 24-a Detroit-a a chhungte hmu tura a zinchhuak tur chu Yangon International Airport-ah sipaiten an man a ni. An man chhan hi chiang taka tarlan ni lo mah se nikum kum laihawl vela a chhuahsan tak online news service-a a hnathawh kaihhnawihah thubuai siamsak a ni.
A lawyer hian sorkar laka hela puhna thubuaia bail dilna chu Nilaini khan court chuan hnawlin, judge chuan dan hnuaiah chhuah zalen theih a ni lo tih a sawi a ni, a ti.
Fenster an khungna, Yangon-a Insein Prison court-a hearing a neih lai hian media leh mipui lam an tel phalsak an ni lo. Judge chuan court hian chak zawka thubuai a chinfel theih nan vawiin aṭanga inṭanin kartin Zirtawpni apiangin ṭhutkhawmna nei tura a rel thu Than Zaw Aung chuan a sawi bawk. Nilaini vek khan rorellai sipai sorkar chuan Southeast Asian palaiin sorkar an paihthlak taka hruaitu, Aung San Suu Kyi hmuh a tumna chu an lo hnawlsak tawh bawk a ni. Sipai hotu, vice-senior general Soe Win chuan ram dang palaiin thubuai nei mek hmuh a tum hi an ram danin a phal lo tih a sawi.