Damon Galgut-a'n Booker Prize 2021 dawng

South African playwright leh novelist Damon Galgut chu a lehkhabu ziah, 'The Promise' vangin 2021 Booker Prize a dawng a, South African novelist zingah he chawimawina dawng thei pathumna a ni.

'The Promise' hi Galgut-a novel pakuana a ni a, South Africa-a chi inthliarna nasa tak thlen hunlai aṭanga boruak a inthlak danglam chhoh hun, kum 1948 - 1990 inkara Galgut-a seilenna, Pretoria khaw pawn farm-a mingo chhungkaw pakhat leh an awmpui mihang chungchang a ziahna a ni.

Booker a dawn hnua a thusawi zawhah Galgut hian an ram khawmualpui, continent zahderna a lantir zui nghal a ni.

Kum 17 leka upa a nih a novel hmasa ber ziaktu, Galgut chuan British chawimawina ngaihhlut tak, Booker Prize a dawng chu a thinlung takin a lawm tih a sawi a, he dinhmun thleng tur hian hun rei tak a bei tih a sawi.

"Africa rama ziak mite tan kum ṭha tak a ni. Ka khawmualpuia ziaktu hriat hlawh tak leh mite la hmelhriat la ni ve lem lote'n an thawnthu hril tawh leh la sawi chhuah loh aiawhin chawimawina hi ka pawm a ni." a ti a "Min ngaihthlak chhunzawm zel rawh u. Thil tam tak pek tur cheu kan la nei a ni", a ti.

Kumina Nobel Prize for Literature dawngtu chu African ziakmi Zanzibar-a piang novelist Abdulrazak Gurnah a ni a, France rama literary prize sang ber Goncourt pawh African mi bawk, kum 31 mi Senegalese author Mohamed Mbougar Sarr chuan a dawng bawk a ni.