Covid-19: WHO-in Europe leh Central Asia-ah hri leng thar leh dawn tih sawi

World Health Organization (WHO) chuan Europe leh Central Asia region-a ram 53 te chuan kar rei lo te hnuah coronavirus hri leng thar an hmachhawn theih thu leh, nakkum February 1 ral hmain hri vanga thi mi nuai nga vel an awm hman a rinawm thu a sawi.

Heng bialah hian kar liamta chhung khan Covid-19 vanga damdawi-ina dah luh ngai hi a letin an pung tawh a ni.

WHO Regional Director for Europe, Dr. Hans Kluge chuan Europe leh Central Asia biala cheng mipui zinga 95% te'n ṭha taka hmaituamna, mask an hmang anih chuan hri vanga thi zat hi 1,88,000 velin an tlahniam thei dawn tih a sawi a ni.

Kar li liamta chhung khan heng bialah hian coronavirus kai 55% in an pung a, Europe leh Central Asia region-ah hian khawvel puma hri kai thar zinga 59 % awmin, thihpui zinga 48% an awm bawk.

Denmark khawpui Copenhagen-a WHO Europe headquarters-a reporter-te a kawmnaah, Dr Kluge chuan hri leng vanga buaina chu a inṭan chho leh tih sawiin, Europe chu hri leng hluarna hmunpui ber, epicentre a nih leh tawh thu a sawi. Mahse health authority-te chuan hri chanchin an hriat chian tawh bakah, hri leng do letna turin hmanrua pawh an nei ṭha tawk tawh a ni, a ti.

Kluge chuan hri leng lo darh leh chhan chu invenna ngaih pawimawh tawk loh vang leh area ṭhenkhata vaccine la an tlem vang a nih thu sawiin, vaccine lak ṭhat lohna hmun apiangah hri kai damdawi-ina dah ngai an pung niin a sawi.

WHO Europe chuan kar khat chhungin an bial chhungah Covid kai thar mtd 1.8 an awm chho leh a, a kar hmasa aiin 6% in a pung a, hemi chhunga Covid-19 vanga thi chu mi 24,000 niin 12% in a pung bawk a ni, a ti.

WHO report tarlan danin, Europe region-ah mi tluklehdingawn khat velin vaccine dose khatna an lak tawh laiin an zinga 47% chiahin dose bikimin an la. An bial hi Delta variant hmuhchhuah tamna ber a ni a, hetihlai hian AY. 4.2 leh AY.4.3 te chu Europe ram ṭhenkhatah hmuhchhuah a ni bawk.