US-in Ethiopia-a America mi awmte chhuak turin hriattir

US chuan Ethiopia rama US sorkar hnuaia thawk, non-emergency staff ni lote leh America mi awmte chu ram chhunga buaina thleng mek avangin Ethiopia ram chhuahsan turin a hriattir.

Ethiopia khawpui, Addis Ababa-a US embassy chuan thuchhuah siamin, Ethiopia ram chhung dinhmun chu a him lo a, hei vang hian US mi leh sa awmte chu a rang thei ang bera hmun dang pan turin a hriattir a ni. Hemi hma hian State Department chuan America mite chu Ethiopia rama zin lo tur hian a lo hriatttir tawh bawk.

Helpawl pakua leh Ethiopia sorkar inbeihna avangin ram chhung dinhmun hi a ṭha lo hle a, helpawlte hian prime minister Abiy Ahmed kaihhruai sorkar paihthlak a nih theihna turin an ṭangrual dawn tih pawh an lo sawi tawh a ni. Helpawl intelkhawmte hian Nilaini hian thawhhona tur inremna thuthlung hi ziah an tum a, an zingah hian hun rei tak sorkar nena lo inbei tawh, Oromo Liberation Army leh Tigray People's Liberation Front pawh an tel.