Jair Bolsonaro chunga lungawi lo Brazil scientist-te'n medal hnawl

Brazil rama science leh technology lama chawimawina sang ber, National Order of Scientific Merit dawng tura thlan scientist 21-te chuan President Jair Bolsonaro laka an lungawi loh avangin medal hi an hnawl.

President Bolsonaro hian kar liam ta Nilaini khan kum 1992 aṭanga science leh technology lama hnathawk ṭhate chawimawina an lo pek ṭhin, National Order of Scientific Merit dawng tur mi 25 a puang a ni. Mahse ni hnih hnuah chawimawina dawng tura thlan chhuah tawh zinga pahnih chu a paih leh.

Scientist dang 21-te chuan President hi open letter thawnin, chawimdaiwna dawng tura a thlan tawh zinga mi pahnih a paih leh avanga an lungawi lohna lantir nan, medal an dawn tur pawh hi an hnawl tih an sawi.

President-in chawimawina dawng tura a thlan zinga a hnawl leh takte hi pakhat zawk chu Dr. Marcus Lacerda niin, Bolsonaro-an hripui a hmachhawn dan sawiseltu langsar tak te zinga mi a ni. A dang leh pakhat chu kum 2019-a Bolsonaro-a'n President office a luah hnua Health ministry-a HIV/AIDS department director aṭanga ban tak, Dr Adele Benkazen a ni.

Brazil President hi research and technology budget a tihhniam avangin scientific community lam aṭangin sawisel a tawk nasa hle a, hei bakah Covid-19 hri leng a do dan leh, he hri chungchanga scientist-te thusawi a hnawl avangte pawhin sawisel a ni fo bawk. President hian health expert-ten hri darh tur venna atana face mask hman leh in lama inkhung ṭhat an sawi uarte chu a thlawp ve lo a, chloroquine chu Covid-19 hri kai damdawi atan a ṭhat thu a sawi bawk.