Meeting nei turin Kim Jong-un-an Singapore a thleng

North Korea ram hotu, Kim Jong-un chuan US President Donald Trump nena June 12-a meeting an neih tur hmang turin nimin khan Singapore a thleng niin Singapore media-te chuan an tarlang. US President Trump pawhin Canada-a G7 summit a hmanna aṭangin nizan khan Singapore hi a pan beisei a ni.

President Trump chuan NKorea ram hotu nena meeting an neih tur hi remna leh muanna zawnna tur a ni tih sawiin, meeting-ah hian reiloteah an hmalak tumna chu a hlawhtling thei dawn em tih a hre thei nghal mai dawn niin a sawi.

Trump chuan Kim Jong-Un chuan a ram mipuite tana thil ṭha tak tih a duh a, hemi atan hian hun remchang tak a inher chhuak a ni, a ti.

Kim Jong-un phurtu thlawhtheihna hian nimin chawhnu lam khan Singapore hi a thleng. Kim hian Jet Ilyushin-76 (IL-76) a hmang a, hei bakah hian Chinese private Boeing 747 jet hmangin ei tur bakah car eng emaw zat phurin Singapore hi a pan bawk. Kim hi St. Regis Hotel-ah a thleng dawn nia sawi a ni. He hmunah hian China President Xi Jinping pawh a lo thleng tawh a ni.

Kum 2011-a North Korea ram hotu atana dah a nih hnuah Kim hian thlawhtheihna hmangin ram dangah ṭum khat chauh a la zinchhuak nia sawi a ni. Kumin May thla khan Ilyushin-62M jet hmangin China-ah a zin a ni.