G7 Summit-ah hmeichhe naupang zirna atan dollar tld 3 dah tiam

Khawvel ram thilithei pasarih, G7 tia sawiten La Malbaie, Canada-a summit an neihah khawvel ram hrang hrangah hmeichhe naupangte lehkha zirtir an nih theihna turin dollar tluklehdingawn thum dah a tiam. Hei hian raltlante pawh a huam tel dawn a ni.

Quebec resort-a summit thlengtu, Canada Prime Minister Jutic Trudeau chuan dinhmun harsa tak tawk mekna hmuna awm, hmeichhe naupangten lehkha an zir ve theihna tura ṭum khata sum dah tam ber a nih thu a sawi. He hmalakna atan hian Canada chuan dollar maktaduai 300 a pe dawn tih a sawi bawk.

Canada-a G7 summit-ah hian sumdawnna thil bikah US President Donald Trump leh ramdangte inkarah inremna a awm thei lo. US thawhpui ram dangte chu tunhnaia Trump-a'n Steel leh Aluminium-a chhiah lak a tih pun avangin an thinrim hle a, hei hian sumdawnna kawnga khawvel indona a thlen an hlauthawng a ni.

G7 ah hian Canada, US, UK, France, Italy, Japan leh Germany te an tel a ni.