Iraq-ah ballot paper dahna hmun a kang

Iraq Parliament inthlanpui neih zawh taka vote tlate chhiar ṭhat tura tih a nih hnuah, Baghdad khawpuia a ballot paper dahkhawmna hmun lian berah kangmei a chhuak.

Kangmei chhuahna hmun hi Baghdad khawchhak lam district-a vote tla an dahkhawmna hmun a ni. Official-te chuan warehouse kanga ballot box tam zawk chu a him niin an sawi.

May thlaa Parliament inthlanpui neihah khan Shia Muslim cleric Moqtada Sadr kaihhruai pawl chuan hnehna an chang a, mahse he inthlanah hian vote tihchingpen nia sawi a nih avangin Parliament chuan vote tla zawng zawngte hi chhiar ṭha leh vek turin a ti a ni. Vote tla hi maktaduai 10 chuang a tling a ni.

Interior ministry thupuangtu chuan al-Rusafa district-a wareshoue pali zinga pakhat a kang tih a sawi a, he kangmei chhuah hi tihpalh thila thleng nge, hal luih tih chhui chian mek mek a nih thu thuneitute chuan an sawi.

May 12-a inthlanpui neihah hian a ṭum khatna atan electronic vote-counting machine hman a ni a, hei hi vote a chingpenna chhan pakhat niin Prime Minister Haider al-Abadi chuan a sawi. PM chuan kangmei chhuak chungchang hi sawilang lo mah se, mi ṭhenkhat Iraq leh a democracy tihchhiat tumtu an awm niin a sawi a, sorkar chuan Iraq himna tichhe thei zawnga chete na taka bei let turin a theih angin hma a la dawn tih a sawi bawk.

Parliament speaker kalchhuak tur chuan kangmei chhuakin ballot paper eng emaw zat a kanchhiat avangin inthlan ṭhat buatsaih ni se a duh thu a sawi. May thlaa inthlanah hian Salim al-Jabouri hi a chak zo lo a, ballot paper pawmna warehouse kang chu tum reng vang leh ruahman lawk anga hal nia a ngaih thu sawiin, vote tihchingpen leh khawih danglam thup bo tumna niin a sawi a ni.