Gaza ramri-a buaina thlen chhanah Iran puh

Israel chuan Gaza ramri-a Palestinian te nawrh huaihawt vanga tharum thawhna nasa tak a chhuah chhanah Iran a puh. Ramri-a Palestinian leh Israel sipaite inkara buaina chhuak vang hian mi 100 chuang an thi tawh a ni.

Israel sipaite chuan kar kalta khan thlawhtheihna hmangin Gaza-ah lehkha an thlak a, Palestinian mite chu an him zawkna turin ramri hunga bulahte kal tawh lo turin a hrilh. Lehkha an thlakah hian Gaza mipuite chu Hamas firfiak pawlte hmanruaa ṭang tawh lo turin an chah bawk a, Hamas ho thiltih chu Iran in a nawr vang niin an tarlang bawk a ni.

March 39 aṭang khan Gaza ramri-ah hian Palestinian mi eng emaw zat chuan Palestinian ram dik tak, Israel in a luahsak chu pek let phutin nawrh an huaihawt tawh a, ramri hungnate tihchhiat an tum a ni. Mipuite pungkhawmte hi Israel sipaite chuan lo dan an tum a, an innawr buai fo a ni. Gaza health ministry chuan ramri-a Israel sipai duty-te silai hmehpuahah Palestinian mi 123 an thi tawh niin a tarlang.

Human rights group-te chuan Israel sipaite hi nawrh huaihawtte chungah an che na lutuk niin an sawi a, mahse Israel chuan sipaite hian mahni invenna atan chuah silai an hmetpuak niin a sawi thung.