New Zealand-a Covid vaccine la duh lote'n lungawi lohna lantir

New Zealand sorkarin puitling chinte Covid-19 vaccine lak vekna tur dan a siam leh, hri darh tur venna atana lockdown a puan duh loin nimin khan mipuiten lungawi lohna an lantir.

Nawrh huaihawt vang hian Parliament building, Beehive tiha sawi luhka pahnihte chu khar an ni a, police leh security force mi leh sa ṭhahnem tham tak duty tir an ni bawk. Nawrh hauihawt zinga a tam zawk hian mask pawh an vuah duh lo a, Wellington khawpui dungah kawng zawhin, Parliament kawtah an awmkhawm zui leh a ni.

Pungkhawmte hian "Zalenna" tih leh "Kiwi-te hi chhimtir anga enchhinna neihna tur kan ni lo" tih thuziakte an keng a, sorkar chu vaccine lak ngeina tur dan leh inkhuahkhirhna dan a siamte hlip tura phutin an aurual bawk.

"Tuman min chelhlui thei loa, ka taksaa lut tura ka duh loh chu tuman min lak luih tir thei lo ang" tiin lungawi lohna lantirtute zinga mi pakhat chuan Parliament kawtah a sawi. "Sorkar hian kum 2018 ang kha min pe let leh turin ka ngen a ni. Thil ho te a ni. Ka zalenna ka hmu let leh duh," a ti.

New Zealand hian kumin chhungin hri inkaichhawn awlsam tak Delta variant an thunun theih loh avangin harsatna an tawk chho leh a, hei vang hian prime minister Jacinda Ardern chuan inkharkhip hmanga hri an dona chu vaccine tam zawk semchhuah hmangin do zawk turin ruahmanna a siam a ni.

Thla hmasa khan Adern chuan health leh disability sector-a zirtirtu leh hnathawkte chu Covid-19 vaccine dose bikima an lak a ngaih tur thu a sawi. Health kaihhnawiha inkhuahkhirhna siamte chu mipui zinga 90% te'n vaccine an lak hunah tihtawp a tum chauh thu a sawi bawk.

Ram dang aia khuahkhirhna an kalpui nasat avangin mipui lam aṭanga sawiselna te tawk chhoin, mipuite hian zalenna zau zawk duhin an lungawi loh thu an tlangaupui a ni.

Sorkarin public sector-a hnathawkte vaccine la ngei tura thuchhuah a siam hnuah mipui lungawi lote hian mihring anga in cheibawl tur te, an zalenna duha kalkhawm an nih thu leh sorkar chetdan chu mimal zalenna inrahbehna a nih thute an sawi.

New Zealand hi Covid-19 kai tlem berna zinga mi a ni a, nimin thleng khan hri kai mi 8,000 leh thihpui 32 an awm tawh a ni. Nimin vek khan hri kai thar 125 an awm leh a, puitling vaccine la thei chin zinga 80% te chuan dose bikimin an la tawh a ni.