Taliban-te'n polio vaccine semchhuah hna kalpui an thlawp
World Health Organization (WHO) leh United Nations Children's Fund-te chuan Thawhṭanni aṭang khan Afghanistan-ah polio vaccine semchhuah hna an kalpui ṭan a, hei hi kum thum chhunga rampuma hri dona beihpui an thlak ṭum khatna a ni.
Afghanistan health ministry-a National Emergency Operations Coordinator for the polio programme, Naikwali Shah Momim chuan November 8 aṭang khan ramchhunga hmun hrang hrangah campaign hi kalpui ṭan a ni tih a sawi a, mahse thawktu, trained staff lamah indaih lohna avangin buaina an tawh phah tih a sawi.
He beihpui thlak kaltlang hian naupang maktaduai thumte hnenah pek chhuah hman tum a ni a, he hmalakna hi Afghanistan-a rorellai Taliban pawhin an thlawp thu an sawi. Hei hian ramchhung hmun kilkhawr leh kalpawh harsatna hmuna naupang awmte tana pekchhuah kawngah team-te nasa takin a ṭanpui dawn tih WHO chuan a sawi.
Afghanistan leh a ram ṭhenawm Pakistan-te hi khawvel ram zinga polio hri leng la hmuhchhuahna ram tlemte zing ami an ni. Afghanistan khawchhak lamah kumin khan polio worker ṭhenkhatte chu silaia kahhlum an ni a, he inbeihnaa pawikhawihtute hi hriat chhuah an la ni lo.
Kumin August thlaa khawthlang ram thlawp, Afghanistan sorkar a tlukchhiat hma khan Afghanistan-ah kumin chhungin poliovirus type 1 (WPV1)- kai pakhat chiah an awm a, nikum khan hri kai 56 an awm thung a ni.
He hri hi nuaibo a nih hma loh chuan ramchhunga mihring chengte tan a la hlauhawm reng a, a bikin health system hnufual tak vangin hri inkaichhawn a hlauhthawnawm hle tih health expert-te chuan an sawi.