Singapore-in Covid vaccine la duh lote Inenkawlna a tumsak tawh dawn lo

Singapore sorkar chuan Covid-19 vaccine la duh lo zinga hri kai an awm chuan December thla aṭangin an inenkawlna senso a tumsak tawh dawn lo tih a sawi.

Sorkar hian Singapore-a cheng nghet, permanent residents (PRs) bakah long-term pass holder-te chu Covid-19 hri an kaiin damdawi-ina an inenkawlna senso zawng zawng a tumsak ṭhin a ni. Mahse December thla aṭang chuan kalphung hi thlakin, vaccine la lo chu enkawlna a tumsak tawh lo ang.

Health minister Ong Ye Kung chuan Covid vaccine la thei chin zinga la duh lo tam tak an la awm a, heng zinga mi eng emaw zat chu hri kai enkawl ngai an awm tiin, ICU-a dah ngai pawh an tam thu a sawi. Vaccine la vek tura mipui nawrna turin he thutlukna hi an siam tih a sawi. Hetih lai hian kum 12 hnuai lam leh natna kaihhnawih thil avanga vaccine la thei lo zinga hri kai awmte enkawlna senso erawh chuan sorkar hian a la tumsak chhunzawm zel dawn thung a ni.