Donald Trump-an NKorea hrekna hlih a remti ; US-SKorea sipaite war games titawp dawn
US President Donald Trump chuan North Korea ram hrekna hlih a remtih bakah an ram himna tur ngaihtuah sak a remti bawk nia tarlan a ni.
North Korea state media, Korean Central News Agency (KCNA) chuan Donald Trump leh North Korea ram hotu Kim Jong-un ten Singapore-a meeting an neih hnuah, Trump hian US-in NKorea a hrekna hlih a remtih thu a sawi a, hemi rual hian US leh South Korea sipaiten indo nunchan an zir ṭhin pawh tihtawp a ni dawn tih a sawi bawk niin a tarlang.
Hetih lai hian KCNA report chungchang hi White House chuan ala nemnghet lo thung. Mahse Thawhlehni khan Trump chuan ram pahnih sipaiten indo nunchan an zir ṭhin chu tihtawp aduh thu a sawi a, NKorea nuclear programme titawp tura nawr chhunzawm zel nan NKorea ram hrekna pawh hman chhunzawm a la ngai dawn niin a sawi a ni.
Singapore-a Kim nen meeting an neih hnuah Trump hian US-ah a kir tawh a, meeting chungchang hi a twitter-ah eng emaw zat tarlang mah se, NKorea ram hrekna chungchang erawh engmah a sawilang lo a ni. Kim nena inbiakna hlawhtling tak an neih thu sawiin, he meeting hi an neih tak tak ringlotute chu a nuih zui a ni. A tweet pakhatah chuan khawvel-a nuclear vanga chhiatna rapthlak tak thleng thei laka himna tura hmalakna lian tak a ni tih a sawi a, "Rocket kahchhuah, nuclear test leh research-te a awm tawh lo ang!" tiin, Kim chunga a lawmthu a sawilang bawk.
Trump leh Kim te hian meeting an neihah hian Korean peninsula aṭanga nuclear ralthuam tihbona tura thawhdunna turte an ziak a, he inremna an ziah hi Kim pawhin a zawm chhoh ngei a beisei thu Trump chuan a sawi.
Kim-an zin tura Trump-a sawmna pawm
KNCA chuan US President Donald Trump-an zin tura a sawmna chu NKorea hotu Kim Jong-un chuan a remti tih a sawi. Singapore-a meeting hlawhtling tak an neih hnuah Trump hian Kim hi White House tlawh turin a sawm a, Kim pawhin US President hi North Korea-a zin turin a sawm bawk a ni. Kim chuan NKorea leh US chuan an inkar boruak ṭha lo leh sipaite inepnate tihtawp thuai a ṭul thu a sawi.
Thawhlehni-a meeting an neih hma hian Trump chuan Kim nena an meeting neih hi a hlawhtling a nih chuan Kim hi US-a zin tura a sawm tur thu a lo sawi tawh a, mahse a beisei anga meeting hi a kal lo a nih chuan a tawpsan nghal tur thu pawh a lo sawi tawh a ni.