ICC-in Congo warlord chhuahtir

International Criminal Court (ICC) judge-te chuan Democratic Republic of Congo hel hruaitu leh Vice President Jean-Pierre Bemba chhuah turin thupek an tichhuak.

Kum 2016 khan Bemba hi war crimes leh a mihring puite laka pawikhawihna thlena puhna thubuaiah thiam loh chantir a ni tawh a, mahse hei hi appeal judge-te chuan hnawlin chhuah turin thupek an siam a ni. Hetih lai hian thuhretute thama puhna thubuaiah erawh hremna pek a la ni dawn a ni.

Judge-te chuan a thubuai danga hremna pek tur a nghah chhungin Bemba hi Belgium-a a chhungte bulah a awm thei ang tih an sawi.

Thuhretute thamna pea puh chungchangaah hian tan tir theih rei ber, kum nga aṭangin Bemba hi 80% vel chu jail-ah a tan tawh avangin, a hremna tur tihchhuah hmaa lo hrek beh reng chu a rem lo niin judge-te chuan an sawi.

Bemba hi ICC-in a lakah international arrest warrant a tihchhuah hnuin kum 2008 khan Belgium-ah man a ni. Bemba a kaihhruai helpawlten kum 2002–2003 chhunga an ram ṭhenawm, Central African Republic-a tualthah leh pawngsual an thlen ṭhin dang zo loah puh a ni. Kum 2016 khan thiam loh chantir niin, kum 18 tang tura hrem a ni. Mahse Bemba chuan he hremna hi ngaihtuah ṭha turin a ngen a, a ngenna ngaihtuahtu appeal judge-te chuan a ṭhuihruaite pawikhawihna thleng vangin Bemba hi mawhphurtua puhin hremna pek ngawt theih a ni lo ang, an ti.