Ram hrang hrangin Trump-Kim meeting fak

US President Donald Trump leh North Korea hotu Kim Jong-un ten Thawhlehni-a Singapore-a meeting an nei chu ram hrang hrang hruaitu leh politician ten lawmawm an tih thu sawiin, meeting hlawhtling tak an neih theih vangin an fak.

Chinese State Councilor leh Foreign Minister Wang Yi chuan meeting neih tak chu thil pawimawh tak, China-in hun rei tak a lo beisei tawh a nih thu a sawi. Hruaitu pahnihte chuan an inkara inhriatthiam lohna titawp tura an beih chhunzawm a, inrintawnna neia harsatna awmte pawh an chinfel theih zel a beisei thu a sawi.

Israel Prime Minister Benjamin Netanyahu chuan summit chhinchhiah tlak tak an neih theih avangin Trump chu a lawmpui thu a hrilh a, "Korean peninsula-a nuclear ralthuam tihbona tur a hmalakna pawimawh tak a ni", a ti.

Kuwait Emir Sheikh Sabah al-Ahmad Al-Jaber Al-Sabah chuan Singapore-a thawhdunna tur inremna ziah chu US leh NKorea inkara inremna tluantling awmna tur lungphum pawimawh tak a ni, tiin, Korean Peninsula-a himna leh muanna awmna tur a ni tiin a sawi.

Nepal Ministry of Foreign Affairs chuan summit-a an thurelte chu ṭha taka zawm chhoh a ni ngei dawn niin a sawi a, Nepal chuan Korean peninsula-a boruak muanawm leh ngelnghet awmna tur kawng sialtu tur a ni, a ti.

Brazil pawhin ram pahnih hruaituten inbiakna hmanga remna leh muanna a awm theihna tur kawng an zawng chu fakawm a tih thu a sawi a, an inbiakna chuan rah ṭha tak a chhuah chhoh zel a beisei thu thuchhuah siamin a tarlang.

Europe ram hrang hrang hruaitute pawhin summit hlawhtling tak neih a ni chu an lawmpui thu an sawi bawk.