Ethiopia-ah UN staff 16 hreng

United Nations (UN) thupuangtu chuan sorkar sipai leh firfiak pawl, Tigray People's Liberation Front (TPLF) te inbeihna thleng mek karah Ethiopia rama an staff leh chhungte 16 chu hren an ni tih a sawi.

UN thupuangtu Stephne Dujjaric chuan Ethiopia khawpui, Addus Ababa-a an staff hren mekte hi chhuah an nih thuai theihna turin Ethiopia sorkar nen hma an la mek tih a sawi zui bawk. Thawktu hren mekte hi Ethiopia mite vek an ni.

Ethiopian Human Rights Commission chuan Addis Ababa-ah hian Tigrayan mi tam tak man an awm thu report an dawng tih sawiin, an zingah kum upa zawk leh nu leh naupangte pawh an tel a ni, a ti.

Hetih lai hian Addis Ababa police thupuangtu, Fasika Fanta leh sorkar thupuangtu Legesse Tulu chuan UN staff-te man chungchangah engmah an hriat loh thu an sawi a, hei bakah Tigrayan hnam mi tam tak man nia sawi pawh dan bawhchhiate chauh man an nih thu an sawi.

Ethiopia hmarlamah hian hun rei tak sorkar sipai leh TPLF thlawptute hi an inbei tawh a, tun hnaiah TPLF hian chhim lamah hma an sawn chhoh avangin tualchhung buaina hi a nasa zual a, Tigrayan force leh an thawhpuite chuan an ram khawpui hi pan zel an tum thu an sawi tawh a ni. Hei vang hian November 2 khan sorkar chuan ram pumah state of emergency a puang a, hemi hnuaiah hian sorkar chuan court thupek nghak kher loin firfiak pawl thurualpui nia a hriatte chu a man thei dawn a ni. Ethiopia Parliament chuan kumin kumtir lam khan TPLF hi firfiak pawlah a lo puang tawh a ni.