Japan-ah bird flu leng vangin ar nuai 1.4 chuang suat

Japan ramah bird flu leng vangin an ram hmarchhak lama ar vulhna hmuna ar 1,43,000 chu suat nghal an nih thu agriculture ministry chuan a sawi.

Nimina ministry-in thuchhuah a siamah, kumin thlasik boruak inṭanah bird flu hi a leng leh nia sawiin, Akita Prefecture-a Yokote khuaa farm-a ar nuai 1.4 chuangte chu suat an nih thu leh, he farm aawmna aṭanga km 10 huam chin chu restricted zone-ah puan nghal a nih thu a tarlang.

Tuna an dinhmun tawn mekah chuan bird flu hi arsa leh artui eina aṭanga mihringa kaichhawn theihna a awm loh thu ministry chuan a sawi nghal bawk. Hetih lai hian China ramah chuan kuminah bird flu kai hi eng emaw zat an awm a, hei hi epidemiological expert lam pawhin an ngaihven hle a ni.

China-ah hian kuminah avian influenza, H5N6 subtype kai hi mihring 21 hmuh an ni tawh niin World Health Organisation chuan a sawi a, an zinga paruk chuan an thihpui a ni. Nikum khan mihringa bird flu kai hmuhchhuah hi panga chauh an awm thung.

Tun hnaiah Poland-a ar farm-ah bird flu hi a lo leng tawh bawk a, ar nuai 6.5 chuangin hri hi an kai a ni.

Nikum thlasik lai kha Japan hian bird flu leng hi a tuar nasa hle a, hri leng vang hian ar maktaduai thum chuang suat an ni.