Pfizer-in puitlingte Covid booster dose pek remti turin US thuneitute ngen
Damdawi siamtu company lian, Pfizer chuan United States-a health lama thuneitute hnenah thlasik boruak inṭan tur karah coronavirus hri kai a hluar chhoh zel hlauhthawnna a nasat avangin, US mipui kum 18 chin chunglamte hnenah Covid-19 vaccine booster dose lak phalna pe turin an ngen.
American mi, kum upa lam leh natna benvawn neite chu vaccine dose thumna lak hi phalsak an lo ni tawh a ni.
Thawhlehni khan Pfizer-BioNTech chuan US-a Food and Drug Administration (FDA) chu ramchhunga puitling chin hnenah pechhuak phalsak vek turin an ngen a ni. Hunpui lo thleng tur leh, khawvawt avanga inchhung luma punkhawmna a tam chhoh dawn avangin Covid-19 hri leng hi a darh chak leh thei tih hlauhthawnna a awm karah he ngenna hi an siam a ni.
US Centers for Disease Control and Prevention (CDC) tarlan danin hun eng emaw chen chu hri kai thar, damdawi-in panpui ngai leh thihpui an tlahniam tih an sawi. Mahse US mipui ṭhahnem takte chuan vaccine hi an la la lo thung.
CDC chhinchhiah danin, US mipui zinga 70% te chuan Covid vaccine hi dose bikimin an la tawh a, vaccine dose kima la tawh zinga mi maktaduai 21.5 te'n booster dose an la tawh bawk a ni. US hian tunhnai khan Pfizer vaccine chu naupang kum 5-11 inkar tan pawmpuina an lo tichhuak tawh bawk.
President Joe Biden kaihhruai sorkar hian puitling zawng zawngte tan booster dose pechhuak turin ruahmanna an siam a, mahse September thla khan FDA scientific adviser-te chuan he ruahmanna hi an hnawl a ni. Panel hian ṭhalai, taksa lama harsatna nei lote chuan dose dang an mamawh tawh lo tih sawiin, khawvel puma mi tam zawkten vaccine dose khatna pawh an la lak theih loh laiin he ruahmanna lo siam hi an duh lo a ni.
Pfizer hian mi 10,000 aṭanga booster an zirchianna result an thehlut tawh a, US-ah booster campaign kalpui a hun tawh takzet tih an sawi.
Zirchianna chuan booster hian hri kai natna langchhuaklo te chu 96% dawn a veng thei a, hri inkaichhawn awl tak Delta variant lakah pawh a venghim ṭha hle tih an sawi. Pfizer vaccine dose hnih an lak zawha side effect pawh a in ang a ni.
US hian an rama hman atan Covid vaccine pathum leh booster pakhat pawmpuina an pe tawh a, chungte chu Pfizer-BioNTech, Moderna leh Johnson & Johnson-te an ni. Pfizer emaw Moderna vaccine emaw dose emaw la tawh, kum 65 chin chunglam emaw taksa lama bawrhsawmna nei Covid-19 kai hlauhthawnawma awmte chuan thla ruk hnuah booster dose an la thei.
Dose khata lak chi Johnson & Johnson vaccine hi dose hniha lak chi nena khaihkhin chuan natna a do theihna a hniam zawk avangin Johnson & Johnson vaccine la te hian dose an lak aṭanga thla hnih hnuah booster dose an la leh thei a ni. He kalphung hnuaiah hian dose kima la tawh mi pathum zinga mi pahnih zel te chuan tun aṭanga thla rei loteah booster dose hi an la thei tawh dawn a ni.
US hian mipuite chu company dang siam booster dose lak an phalsak tawh a, he kalphung hi "mixing and matching" tiin an sawi.
FDA-in puitling tana Pfizer booster dose lak a remtih chuan, CDC chuan booster lak dan tura inkaihhruaina dan a tichhuak ang.