Covid-19 vangin mi nuai 1 chuang an la thih belh ang : German virologist

Germany-a viroligist langsar ber zinga mi, Christian Drosten chuan an rama hri leng thawh lina lo thleng tur dang chat tura hma an lak thuai loh chuan, mi nuai khat chuang chu Covid-19 vangin an la thih belh leh theih tur thu a sawi.

Germany-ah hian hri kai hi an pung thar leh nasa a, Nilaini khan hripui len ṭantirh aṭanga hri kai hmuhchhuah tam ni ber thlengin, hri kai thar mi 40,000 dawn an awm a ni.

Drosten chuan an dinhmun a ṭhat loh avangin tuna an chet vat a ngaih thu a sawi. Leipzig University Hospital-a intensive care Covid ward doctor-te chuan hri leng thawh lina hi a hma ami zawng ai pawha rapthlak ber a nih theih thu an sawilawk bawk.

Saxony state chu ni sarih chhunga hri kai thar tam berna state niin, mipui nuai khat zinga 459 te chuan hri an kai a ni. Ramchhunga hri kai dan rate chu maktaduai khatah 232 a ni. Saxony hi vaccine lak tlem berna niin ,state mipui zinga 57% chauhin vaccine hi an la la a ni.

Germany Health Minister chuan hri darh chhanah mipuite chu demin, tuna hri leng mek hi vaccine la lo te vanga thlengah a puh.

Tunkar tir khan Saxony-ah hian mipui vaccine la lo te chu bar, restaurant, public event, sport leh leisure facilities-ahte kal khapna dan an tichhuak a, state ṭhenkhat pawhin he dan hi zawm ve an tum tih an sawi bawk.

Hetih lai hian Germany-a vaccine la duh lo pawl, anti-vaxxers sang chuangte chuan kar liamta khan lungawi lohna an lantir a ni.

Germany-a naupang kum 12 chunglam mi maktaduai 16 te chuan vaccine dose kim pek an la ni lo. Germany sorkar chuan anti-vaxxer-tam zawkte vaccine la tura thlem thluk a harsat tawh thu a sawi a, politician-te chuan khawtlangah pawh intliar hranna nasa zawk a thlen phah an hlauthawng hle bawk.