UNSC-in Myanmar tualchhung buaina titawp turin ngen

United Nations Security Council (UNSC) chuan Myanmar rama tualchhung buaina chhuak chhunzawm zel chu pawi an tih thu leh, he buaina hi tihtawp thuai tur leh, Myanmar sipaite pawh inbengdai turin a ngen.

UNSC member ram 15-te chuan Nilaini khan he thuchhuah hi an siam a, February 1-a sipaiten sorkar thuneihna an hnehchhuh hnua sipaiten ram puma state of emergency a puan zui leh, hemi hnua sipaite leh sipai rorelna duhlotute inkar inbeihna thleng chhunzawm reng chu pawi an tih thu an sawi a ni. Myanmar mipuite ṭhatna tur ngaihtuaha inremna kawng zawnga inbiakna nei tura an duh thu pawh an tarlang bawk.

Thuchhuah an siamah hian UNSC chuan Association of Southeast Asian Nations (ASEAN) Special Envoy an thlawp thu tarlang bawkin, ASEAN palaiin Myanmar ram a tlawh a, party hrang hrang aiawhte hmu a, mipuite chhawmdawlna pek dan tur sawipui a tumte pawh ṭha an tih thu leh, an nghahhlelh thu an sawi bawk a ni.