US, Mexico leh Canada hruaituten summit nei dawn

United States president Joe Biden, Mexico president Andres Manuel Lopez Obrador leh Canada prime minister Justin Trudeau-te chuan a ṭum khatnan November 18 khian Washington-ah meeting an nei dawn tih Mexico foreign minister chuan Nilaini khan a puang.

He meeting hi ram pathum te'n kum nga hnua summit an neih lehna hmasa ber tur niin, Covid-19 hri leng mek te leh North America lama supply chain ṭha zawk kalpui dan turte an sawiho dawn a ni.

Ram hruaituten meeting an neih piah lakah,Mexico president Lopez Obrador chuan Washington-ah Biden leh Trudeau-te chu a hran ve ve a kawmin, thawhdunna ṭha an neih dan turte pawh sawipui a tum bawk.

Kum 2023-a summit neih tur Mexico-in a thleng thung ang.

Ram pathum hruaitute hian kum 2005 aṭang khan Three Amigos summit tia sawi ṭhin hi an nei ṭan a,kum 2016 thleng khan kumtin deuhthaw inhmuhkhawmna hi an nei ṭhin. Mahse kum 2017, January thlaa US president atana Donald Trump lakluh anih hnu khan summit an neih ṭhin hi an titawp zui a ni.

US, Mexico leh Canada ramte hi United States-Mexico-Canada (USMCA) free trade agreement-in a phuar khawm a, kumtin North America lama sumdawnna kaltlangin USD trillion 1.5 hu an thunun mek a ni.