Myanmar court-in kum 11 tang turin US journalist chungthu relsak

Myanmar sipai court chuan nimin khan US journalist Danny Fenster chu kum 11 tang turin a chungthu a relsak.

Fenster hi immigration law bawhchhia, dan kalha che leh sipai dodal tura midangte fuiha puhnaa thiam loh chantir a ni. Heng thubuai bakah hian tun kar tir lam khan thubuai dang pahnih, firfiak zawnga chetna leh sipai sorkar laka hela puhna thubuai siambelh sak niin, he thubuai hi November 16 aṭangin ngaihtuah a ni ve leh ang. Heng thubuai siam belh sakah hian thiam loh chantir a nih chuan dam chhung tang tura hrem theih a ni ang.

Kum 37 mi, online site Frontier Myanmar-a managing editor, Fenster hi kumin May thla khan Myanmar ram chhuahsan a tum laiin Yangon International Airport-ah man a ni. February thlaa sipaiten civil sorkar thuneihna an hnehchhuh hnu khan Fenster bakah journalist dang emaw zat chu sipaite hian an man ta ni. Journalist man hi mi 80 vel awmin, an zinga ṭhenkhat chu chhuah an ni leh tawh a, tunah hian 50 vel an la tang mek a ni.

Frontier Myanmar chuan Fenster hi independent news site, sipaite chet dan sawisel ṭhintu Myanmar Now tan a hmain a lo thawk ṭhin tih a sawi. "Heng a thubuaite pawh hi Myanmar Now-a a thawh lai behchhana an siam a ni. Mahse kum 2020 July thla khan Myanmar Now aṭang hian bangin, a thla lehah Frontier hi a rawn awm a ni. Kumin May thlaa man anih khan Frontier-ah thla kua chuang a thawk tawh a ni,: a ti. Fenster an puhna te hi thiam loh chantirna tur tling engmah a awm lo tih a sawi bawk.

Sipai court thutlukna siam hi mi tam takin an sawisel nghal a, Human Rights Watch-a Asia director Phil Robertson chuan court thiltih dan chu thil awm lo tak a ni tiin, Fenster an puhnate hi thil phuahchawp mai a ni a, eng thilsual mah a ti lo a ni, a ti.