Israel-in Covid hri thar len palh thulh atan 'war drill' buatsaih

Israel sorkar chuan Covid-19 hri chi thar a len palh thulh atan lo inbuatsaihin, Ningani khan 'war game drill' an buatsaih.

War drill hi 'Omega' tia vuahin, Jerusalem-a National Management Centre-ah neih a ni a, he hunah hian civil leh military official-te an tel a ni. Hri leng vanga chhiatna hrang hrang thlen thei laka invenna tura hma lak dan tur te, mipui tam zawk hnenah vaccine pek dan te, curfew puan leh flight khap a ṭul dante pawh an zirho tih prime minister Naftali Bennet office chuan a tarlang.

PM office thuchhuah chuan, "Tunah tak chuan hri leng chungchangah Israel dinhmun chu a ṭha hle. Hri leng thawh lina chu kan do hneh tawh a, Delta variant leng mek pawh kan hneh chho mek bawk. Mahse engnge thleng zel dawn kan hre lo a, hri chi hlauhawm leh kaichhawn awl, vaccine lak pawhin a dan theih lohte pawh rawn lang leh thei a ni, hetiang thleng palh theih laka hma lak dan turte zirin he hun hi buatsaih a ni," a ti.

Israel mipui zingah Covid vaccine dose kima la hi 80% an awm tawh a ni.