Thla thum chhungin ISIS firfiak 600 man an ni : Taliban

Afghanistan-a Taliban sorkar hnuaia Intelligence Department chuan thla thum liamta chhung khan Afghanistan ISIS (Daesh) firfiak mi 600 vel man an ni tih a sawi.

Intelligence department thupuangtu Khalil Hamraz chuan, "Ramchhung hmun ṭhenkhata pawikhawihna leh inthahna thlenga inhnamhnawih Daesh member 600 vel hren mek an ni. Hren zingah hian an hotute pawh an tel a ni," a ti.

Afghanistan-a ISIS firfiakte chetna thleng fo chungchang hi tun hnaia a ṭhenawm ramte pawhin an lo sawi chhuak fo a ni.

ISIS hian tunhnaiah pawikhawihna an thlen fo a, kar liamta khan Kabul-a sipai damdawi-in pahnih bomb hmanga an beihnaah mi 19 an thi a ni . Hei bakah hian Kandahar-a bomb puak chu an pawl tih a nih thu sawiin, Nangarhar leh Parwan province-a tualthahna chu an ruahman anih thu leh Kunduz province hmarlama mi 100 chuang thihna Shia community mosque-a bomb puak te chu an tih a nih thu an sawi.

Ram chhunga ISIS firfiakte pawikhawihna a thlen fo rual hian, Hamraz chuan venhimna an kalpui ṭha tawk tih a sawi thung.

Taliban sorkar, Islamic Emirate thupuangtu Zabiullah Mujahid pawhin ISIS chu an ram tan hlauhthawnna tham a tlin tawh lo thu sawiin province tam taka ISIS sanctuary 21 te chu tihchhiat an ni tawh a ni, a ti. "Daesh firfiakte inzarpharh zel tur dang tur leh nuaibo turin kan bei zel a, an hlauhawmna pawh a tlahniam chho zel a ni," a ti.