Duterte fanuin kum 2022-a VP inthlan chuh dawn

Philippine president Rodrigo Duterte fanu upa ber, Sara Duterte-Carpio chuan kar liamta Inrinni khan nakkum May thlaa Vice President inthlanna neih turah chuh tumin nomination paper a thehlut.

Kum 43 mi, Carpio hian Commission on Elections hnenah kar liamta kar tir lama a zawm tak Lakas-Christian Muslim Democrats (Lakas-CMD) aiawha Vice President inthlanna chuhna tur lehkha hi a aiawh a thehlut tir a ni.

Carpio hian president hlui Ferdinand Marcos-a fapa, senator hlui Senator Ferdinand Marcos Jr. nen inthlanah hian an thawkdun dawn a, Marcos hian President a chuh thung ang. President chuh tumtu zingah hian boxer lar tak, Manny Pacquiao pawh a tel.

Marcos-a party Partido Federal ng Pilipinas chuan Inrinni khan nakkuma vice president inthlana an party hminga ding turin Carpio hi an nemnghat a ni.

Poll body hian candidate-te thachhang dawltu tur hi November 15 thleng thehluh a phalsak bawk. He dan hnuaiah hian candidate te an boral emaw, an inhnukdawk emaw a nih chuan an thachhang dawltu atana an ruatte chu inthlanah an din phalsak an ni ang.

President Duterte seilenna, Davao City-ah a fanu Carpio hi mayor a ni mek a, mi hrang hrang ngaihdan lakah kum 2022 inthlana President-a ding tur hian an duh ber a ni. Pulse Asia-in September 6-11 inkara ram pum huapa ngaihdan a lakah, kum 18 chunglam zingah 20% chuan Carpio hi President candidate atana a duh thu an sawi.

May 2016 inthlanpuiah khan Rodrigo Duterte hi president atana thlan tlin niin, ram danpui hian term khat (kum ruk chhung) bak Philippine President atana din a remti lo a ni.

Philippine law hnuaiah Vice President leh President hi a hran ve vea thlan an ni ṭhin.