Ecuador tanina buaina chhuakah mi 58 an thi

Ecuador khawpui Guayaquil-a tanin chhunga buaina chhuakah tang mi 58 vel an thi a, mi dang 12-te'n hliam an tuar tih tualchhung thuneitute chuan kar liamta Inrinni khan a sawi.

Buaina hi Litoral Penitentiary-ah kar liamta Zirtawpni zan aṭanga inṭanin a tuk Inrinni zing thleng a awh a, police-te an inrawlh hnuah buaina chhuak hi an thunun thei ta a ni.

Buaina hi damdawi tawlhru ṭhin pawl zinga thuneihna chan inchuhna vanga chhuak a ni.

Ecuador ramah hian tanin chhungah pawl leh pawl inkarah buaina a chhuak fo a, September thla tawp lam pawh khan Litoral tanin-ah hian pawl pahnih inkara buaina chhuak vangin mi 118 an thi a, 79 in hliam an tuar bawk. Thi zinga panga chu an lu tansak an ni. Inrinnia buaina chhuaka thite tel lo hian tan in chhunga buaina chhuak vanga thi hi kuminah mi 230 an tling tawh.

Inrinnia tanin chhunga buaina thleng vang hian tang chhungte tam tak chuan an ram tanin enkawl hna chu sipaite kuta dah turin an phut. Ecuador ramah hian mi tang 40,000 vel awm mekin, an zinga 8,500 chu Litoral taninah hian an awm a ni.