Austria-ah vaccine la lote tan lockdown puang

Austria sorkar chuan an rama hri lengin hluar lam a pan zel avangin hri darh tur venna atan Covid vaccine la lo tan bik khuahkhirhna a siam a, nimim aṭang khan hman ṭan a ni.

Chancellor Alexander Schallenberg an ram dinhmun tawn mek thlirin he thil hi tih ngei a ngai niin a sawi. Covid vaccine la lote chu chhan ṭha tak nei lo chuan pawn chhuah phalsak an ni dawn lo a ni.

Austria-ah hian vaccine dose kima la hi 65% vel chauh an la ni a, Europe khawthlang lam ram zingah vaccine la tlemna ber zingah an tel. Hetih lai hian kar khat chhunga hri kai zat hi mi nuai khatah mi 800 chuang awmin, Europe-ah hri inkaichhawn sanna ber zinga mi a ni thung.

Europe ram dang eng emaw zatah pawh hri kai hi an pun chhoh leh avangin ram tam takin khuahkhirhna an siam leh tawh bawk a ni. Mahse hri kai pun zualna, UK erawh chuan khuahkhirhna hran a la siam leh lo a, mahse health lam thuneitute chuan pawn chhuahnaa face mask hman ngei ngeina tur dan siam tur leh, thlasik chhoa hri hluar chho leh tur venna atana vantlang hmunte pawh khar turin an ngen mek thung.

Austria-in vaccine la lo tana khuahkhirhna a siam hi ni 10 chhung atan a ti phawt a, naupang kum 12 hnuai lamte erawh a huam tel lo. Hetih lai hian he khuahkhirhna siam duh loin an ram khawpui, Vienna-a Chancellor office kawtah mi tam takin lungawi lohna an lantir a, vaccine lak leh lak loh chungchang chu an zalenna a ni tih an sawi. Sorkar dan siam chu inthliarhranna a ni tiin an sawi a, an dikna chanvo humhalh turin an bei zel dawn tih an sawi a ni.

He khuahkhirhna siam hma hian Austria sorkar chuan vaccine la lote chu restaurant, salon leh cinema hall-ahte an kal a lo khapsak tawh bawk. Police-te chuan mipuite vaccine lak leh lak lohte an endik sak ṭhin dawn a ni. Schallenberg chuan he khuahkhirhna an siam hian vaccine la tawh leh la lote in contact tur chu nasa takin a tihniam dawn a, hei hian hri darh zel tur venna kawngah awmzia a nei thei dawn niin a sawi.