Taliban-ten military parade-ah US siam ralthuamte pho lang

Afghanistan-a rorellai, Taliban sipaite chuan Pathianni khan Kabul-ah military parade an buatsaih a, he hunah hian sorkar hmasa hnena pek, US siam ralthuam leh hmanraw hrang hrang bakah Russia siam helicopter-te pho lan a ni.

Defence ministry thupuangtu, Enayatullah Khwarazmi chuan sipai training zo hlim 250-te pualin he parade hi buatsaih a nih thu a sawi.

Military parade-ah hian US siam M117 armoured security vehicle eng emaw zat leh MI-17 helicopter-te pho lan ani a, Taliban sipai rualte chuan America siam M-4 assault rifle an keng bawk. Taliban sipaite ralthuam leh hmanraw tam zawk hi America thlawp Afghanistan sorkar a din laia sipai, national army-te thuam chakna tura US-ina pekte an ni hlawm.

Special Inspector General for Afghanistan Reconstruction (Sigar)-in nikum kumtawp lama thu a sawiah, US sorkar hian Afghan sorkar kutah kum 2002-2017 inkar khan USD tluklehdingawn 28 man hu defence articles leh services, weapon, ammunition, vehicles, night-vision devices, aircraft, leh surveillance systems-te an pe hman a ni. Taliban-ten thuneihna an chan hnuah Afghan sipai tlanchhiate chuan aircraft eng emaw zat hi ram dangah an tlanchhiatpui a, mahse an chhuahpui lohte hi Taliban-te kutah a awm vek a ni. Eng zat chiah nge awm tih hriatchian a ni lo.

US sipaiten Kabul an chhuahsan dawn khan thlawhtheihna 70 chuang, armoured vehicle ṭhahnem tak chu hman chhunzawm theih loh turin an tichhia a, air defence system pawh an tichhe tel bawk a ni.