Myanmar-in US journalist Fenster chhuah zalen

Myanmar sipai court-in kum 11 tang tura a chungthu a lo rel sak tawh, US journalist Denny Fenster chu hremna pek a nih aṭanga ni thum hnuah Yangon bula Insein tan-in aṭangin chhuah zalen a ni leh ta thung.

Denny Fenster hremna pek hi US chuan na takin a lo sawisel tawh a, court chu pawisawilo chungah thutlukna dik lo tak siamah an puh. US diplomat hlui Bill Richardson chuan Myanmar sipai hotu, senior general Min Aung Hlaing pawh hmaichhanah kawmin, Fenster chungchang hi a sawipui a ni.

Hemi hnu Thawhṭanni khan sipaite chuan Fenster hi Insein tan-in aṭanga chhuahin, Richardson kutah an hlan a, hemi tlai hian US lam a pan nghal a ni.

Fenster hi May thla khan US-a haw a tum chu Yangon international airport-ah man a ni a, sipai sorkar dodal leh firfiak zawnga chea puhin thubuai siamsak a ni. Thla ruk zet a tang hman.

Denny Fenster thawhna, Frontier Myanmar pawhin Fenster chhuah zalen a ni chu lawmawm an tih thu sawiin, sipai sorkar hnenah journalist dang an mante pawh chhuah vek turin an ngen nghal bawk. Fenster chuan journalist tang mekte harsatna tawhte leh an chhuah theihna turin a theih angin a bei chhunzawm zel dawn tih a sawi.

US Secretary of State Antony Blinken chuan Fenster chhuah a ni chu lawmawm a tih thu a sawi a, dik lo taka hren mekte pawh chhuah vek turin sipaite chu a ngen bawk.