Suu Kyi-i thubuai siam belh sak leh

Myanmar hruaitu hlui, Aung San Suu Kyi chu nimin khan sipai sorkar chuan thubuai a siam belh sak leh.

Suu Kyi bakah president hlui U Win Myint, Elections Commission hotu hlui leh mi dang eng emaw zat chu nikum, kum 2020 November thlaa inthlanpui neihah inbumna hmang, dan loa thiltiah puhin, an thuneihna dik lo taka hmangah an puh. He inthlanah hian Suu Kyi-i party, National League for Democracy (NLD) chu hneh taka thlan tlin a ni. Mahse sipaite chuan NLD lam hi dik lo taka tlingah puhin, thuneihna an chan hnu kumin July thla khan inthlan result hi an hnawl.

Sorkar enkawl, Global New Light of Myanmar chuan electoral law bawhchhia, thubuai siamsakte hi mi 16 an nih thu a sawi a, mahse court-in a ngaihtuah hun tur erawh a sawilang lo.

Kum 76 mi, Suu Kyi hi February 1-a sipaiten civil sorkar thuneihna an hnehchhuh hnu khan man nghalin, tun thlengin pawn chhuak thei loin hren a ni. Sipaite hian an hren hnuah thubuai 11 an siamsak tawh a, heng zingah hian eiruk thubuai pahnih leh hremna na tak pek theihna Official Secrets Act bawhchhiaa puhna pawh a tel. Heng a thubuai hrang hrangahte hian thiam loh chantir a nih vek chuan kum 100 chuang tang tura hrem theih a ni ang.