Israel-in kum 5-11 inkarte Covid-19 vaccine pek remti

Israel sorkar chuan naupang kum 5-11 inkar chu Covid-19 vaccine pek a remti.

US Health authority-in thla hmasaa naupang tana vaccine semchhuah phalna a tihchhuah hnuah Israel Health Ministry chuan he thuhtlukna hi an tichhuak ve leh ta a ni.

Israel hi khawvel ram zinga puitling leh tleirawl zawkte tana zau zawka vaccine semchhuak hmasa ram zingah an tel a, kumin nipui aṭang khan booster campaign kalpuiin, ram hrang hrang zinga kalpui hmasa ber a ni bawk.

Mithiamte chuan Israel-a vaccine chak taka an semchhuah avangin hri kai an tlakhniam phah niin an sawi a, ramchhunga hri leng mek Delta variant pawh an thunun theih phah a ni, an ti. Mahse vaccine la la lo zingah coronavirus hi a la darh reng a, hri kai zingah hian naupang ṭhanhnem tak pawh an tel a ni.

Health Ministry thuchhuah tarlan danin, expert adviser te'n naupang hnenah Pfizer/BioNTech vaccine pe chhuak tura phalna an dilna chu director general, Dr. Nachman Ash chuan a pawmpui a ni. Ministry chuan tun aṭanga ni rei lote hnuah campaign ṭan hun an puanzar theih tur thu an sawi.