NKorea hrekna hman chhunzawm zel a la ni ang : US

US Secretary of State Mike Pompeo chuan President Donald Trump leh North Korea hotu Kim Jong-un ten summit hlawhtling tak nei mah se, NKorea-in a nuclear programme a tihtawp fel hma chuan US in economy lama a hrekna chu hman chhunzawm a la ni dawn niin a sawi.

Mike Pompeo hi South Korea-ah a zin mek a, nimina Seoul-a press conference a neihnaah hemi chungchang hi a sawichhuak a ni.

Thawhlehni khan Kim leh Trump-te hian Singapore-ah meeting neiin, ram pahnihte thawhdunna tur inremna pawh an ziak a ni. Mahse inremna an ziah dan kimchang erawh hi puanzar a ni lo. Meeting zawh hnu hian North Korea state media, Korean Central News Agency (KCNA) chuan hruaitu pahnihte hian US-in NKorea a hrekna hlih an remti niin a sawi. Hei bakah hian NKorea-in a ngaimawh fo ṭhin, US leh South Korea sipaiten indo nunchan an zirho ṭhin pawh tihtawp a ni tih Trump chuan a sawi bawk a ni.

Seoul-a SKorea leh Japan foreign minister-te nena an inkawmnaah, Pompeo chuan military drill tihtawp a nih tur thu President Trump chuan puang mah se, US, SKorea leh Japan-te inzawnma chu a ngheh tlat thu a sawi. SKorea leh Japan hian military drill neih ṭhin hi an ram himna tur atan a pawimawh niin a ngai a ni.

South Korea foreign minister Kang Kyung-wha chuan US leh SKorea inlaichinna chu a hma ang renga nghet a nih thu a sawi a, Japan foreign minister Taro Kono pawhin Singapore-a Trump-Kim summit neih tak chu hmasawnna tura chona pawimawh tak a ni tiin, ram pathumte chu lungrual takina an thawk ho zel dawn tih a sawi bawk.