Pakistan EC-in Saeed-a party hnawl

Pakistan Election Commission chuan Mumbai khawpui beihnaa mawhphurtu bera puh, firfiak pawl Jamat-ud-Dawah hotu Hafiz Saeed-an political party a din, Milli Mulsim League (MML) inziahluh a tumna chu a hnawlsak nawn leh.

July thlaa inthlanpui neih turah Saeed-a hian MML hming hian inthlan hi chuh a tum a, EC-ah political party anga inziahluh a tum a ni. Mahse Election Commission of Pakistan (ECP) chuan an dilna hi nikum khan a lo hnawlsak tawh a, hei hi ngaihtuah ṭha leh turin Islambad High Court in a ngen hnuah ennawnin, a hnawl nawn leh a ni.

Commission-a member pali awmna bench, sindh member Abdul Ghaffar Soomro kaihhruai chuan MML in register dilna hi ngaihtuahin an hnawlsak a ni. Bench chuan Interior Ministry-in MML leh dan pawna hnawl, JuD hruaitu Saeed ten inzawmna an neih avanga political party anga MML pawm a dodal thu a sawi behchhanin he thutlukna hi siam a nih thu a sawi. Mahse MML hian JuD nen hian inzawmn an nei lo niin a sawi thung. ECP in an dilna a hnawl chhanah Pakistan Muslims League-Nawaz leh an hruaitute chu inrawlhah an puh a ni.

July 25-a inthlanpui neih tura chuh tumin nikum August thla khan MML hi din a ni a, Saeed hian MML tan hian a campaign tawh a ni. Hetih lai hian US chuan MML Hi foreign terrorist organisation-ah a puang a, MML dintute chu dan pawna hnawl Lashkar-e-Taiba (LeT) member-te an nih thu a sawi.