Maldive President hlui leh chief justice thla 19 tang turin hrem

Maldive court chuan an ram president hlui Maumoon Abdul Gayoom leh chief justice ṭanglai Justice Abdulla Saeed-te chu rorelna dik kalpuina tur dal zawnga thiltiah puhin thla 19 leh ni ruk tang turin a hrem.

Prime Minister hlui leh chief justice-te hremna pek hi President Abdulla Yameen-an a thuneihnaa a tihngheh tumna hmanrua anga ngaih a ni bawk. September thla hian inthlan buatsiah a ni dawn a, President Yameen-a hian a term hnihna atan chuh leh a tum a ni. Eptute chuan Yameen-a hian inthlana amah khing thei tur awm nia a hriatte chu a mantir zel niin an puh a, mahse he puhna hi sorkar chuan a pha thung.

Madive rama democracy dan anga hruaitu atana thlan lal hmasa ber, Mohamed Nasheed chu kum 2012 khan bang tura nawr luih a ni a, hemi hnu hian tualchhung politics-ah buaina an tawk chho reng a ni. Nasheed hi kum 2015 khan firfiak zawnga che puhna thubuaiah thiam loh chantir a ni tawh a, kum 13 tang turin hrem a ni.

Gayoom-a hi Maldive ram hruaitu dinhmun chelh rei thei ber niin kum 80 mi a ni tawh a ni. Gayoom chuan an puhna chu thu dik lo nia sawiin, a thubuai ngaihtuah a nih dan chu a dik tawk lo hle niin a sawi. Mahse Criminal Court Judge Hassan Najeeb chuan dan ang taka thubuai hi ngaihtuah a ni, a ti.