New York attorney general-in Trump Foundation khing
New York attorney general chuan Trump Foundation bakah President Donald Trump leh a fate chu dan bawhchhiaah puhin a khing.
Attorney general Barbara Underwood-i chuan charitable foundation hi dan kalhin, kum 2016 US president thlan dawn khan politics thilah a inhnamhnawih niin a sawi. He foundation hi ṭhiat turin a phut bawk.
Trump Foundation chuan thuchhuah siamin he puhna hi thu dik lo niin a sawi thung. President Trump pawhin a twitter aṭangin a chhag let a, New York Democrats-te chuan an theih ang anga amah khinna an zawng niin a sawi.
Attorny general hian President leh a fate, puitling pathum- Donald Jr, Eric leh Ivanka-te chu New York-based charity ah board member atana dah khap a phut bawk. Underwood-i hian President leh a chhungte a khinna hi Ningani, President Trump-a piancham vawi 72-na niah khan Manhattan-a New York Supreme Court-ah a thehlut a ni.
Underwood-i chuan foundation leh a direcor- Trump leh a fate pathum hian dan loin Trump presidential campaign kha an thawhpui a, hei hian non-profit organisation-te zawm tura dan siam a palzut niin a sawi. Trump hian dan kalhin foundation hnenah hian foundation hminga presidential campaign pui tur leh, a sum neihte pawh campaign-na atan a hman tur hian a ti niin a sawi. Petition-ah hian Trump chuan foundation thil neihte chu a mimal sumdawnna tihlarna atan te, a mimal thil leina atana hmang nia tarlan a ni bawk.