Drone hmanga beihnaah TTP hotu Mullah Fazal Ullah a thi

US military official chuan US-in drone hmanga a beihnaah Tehrik-i-Taliban Pakistan (TTP) hotu Mullah Fazal Ullah a thi niin Voice of America (VOA) a hrilh.

Army lieutenant colonel Martin O'Donnell chuan June 13 khan Afghanistan ramri bul, Kunar province-ah drone hmang hian firfiakte lakah hian beihpui thlak a nih thu a sawi a, TTP hotu hi a thi niin a sawi. Mahse hemi chungchang hi Pentagon official-te erawh chuan an la sawichiang duh lo.

Mullah Fazal Ullah hi US leh Pakistan-a beihna tura thupek pe ṭhintu niin official-te chuan an sawi a, kum 2014 December thlaa Peshawar-a Army Public School beihnaah pawh a tel niin an sawi. Hemi ṭum hian mi 151 an thi a, an zinga 130 chu zirlai an ni. US chuan kum 2012-a Nobel Laurreate Malal Yousafzai thah tuma beih a nih pawh khan Fazlullah thupeka tih niin a sawi bawk.

Kumin March thla khan US drone hmanga TTP training-na hmun beihnaah Fazlullah fapa hi a lo thi tawh bawk a, hemi hnu hian US Deparment of State chuan Fazlullah lu man atan hian US dollar maktaduai nga a phal thu a puang a ni.